23 feb 2021

Aprazamento da conmemoración do Día de Rosalía

 A causa da vacinación do profesorado que vai ter lugar o mércores, pospoñemos a conmemoración do Dia de Rosalía para o vernes ás 13:25. 

Estade pendentes da nova programación!!

Día de Rosalía

Desde aquí podedes ver en directo o noso acto de conmemoración do Día de Rosalía, "Rosalía e o mar". Mañá, mércores 24, ás 13:25

21 feb 2021

Conmemoración do Día de Rosalía

 Un ano máis, conmemoramos no noso centro o Día de Rosalía. E este ano escollemos como tema “Rosalía e o mar”.  A natureza foi moi importante na obra de Rosalía de Castro; toda a natureza de Galicia, o mar e a montaña, as veigas e os prados, as fontes e os regatos pequenos, os montes e os ríos, a vexetación e a fauna... Neste momento en que vivimos, limitados nos movementos, lembrámonos especialmente do mar, porque está lonxe de nós,  non podemos achegarnos a el e sentir a súa fermosura e a súa forza. Na obra de Rosalía o mar  foi moi importante e aparece en moitas ocasións, con distintos significados e diferentes simboloxías.  Segundo deixou escrito o seu marido, Manuel Murguía, “o mar foi, na natureza, o seu amor predilecto”.

Por iso nós nesta ocasión queremos lembrar a relación entre Rosalía e o mar e, ao mesmo tempo, facer unha homenaxe ao noso mar e á nosa paisaxe costeira, partindo dun poema de Cantares gallegos, “Nosa Señora da Barca”, en que a autora recrea o ambiente dunha das festas máis concurridas da Galicia mariñeira, a da Nosa Señora da Barca, en Muxía, partindo dunha coñecida copla popular:

“Nosa Señora da Barca

ten o tellado de pedra.

Ben o puidera ter de ouro

miña Virxe, se quixera!”


23 dic 2020

Calendario 2021: Os encantos de Terra de Montes

Un ano máis, quixemos agasallar a toda a comunidade educativa do noso IES cun calendario. Nesta ocasión, as protagonistas son as lendas tradicionais vencelladas a lugares concretos de Forcarei e de Cerdedo. O noso país, Galiza, é rico en cultura popular, en historias de maxia e encantamento: os mouros, os seus tesouros agochados, os bechos que os gardan, os feitizos, as fadas, a comunicación cos mortos...; todo acompañado de fotografías de lugares de fermosura engaiolante.   Estarán connosco mes a mes para facernos lembrar a necesidade de valorarmos  o noso patrimonio e para axudarnos a manter viva a maxia, aínda nestes tempos pouco propicios para os encantos e a fantasía. Feliz 2021 para todos e todas!

21 nov 2020

Conmemoración virtual do 25 de novembro


Velaquí tendes o enlace para conectarvos en directo  coa actividade.


Certame de escrita sobre machismos e desigualdade

Ao longo da historia fóronse establecendo relacións de poder desiguais entre mulleres e homes na nosa sociedade, levando as mulleres a unha situación de subordinación.

As violencias e desigualdades de xénero  aséntanse en costumes, ideas e pautas culturais que aprendemos  desde que nacemos. As seguintes afirmacións  son algunhas desas perigosas crenzas que moitos e moitas de nós temos interiorizadas:

1. O amor pode con todo
2. Por amor eu faría calquera cousa
3. Os celos son unha demostración de amor.
4. Todas as persoas temos unha media laranxa nalgún sitio
5. Cando amas  unha persoa, non desexas a ninguén máis.
6. O amor verdadeiro perdoa e aguanta todo
7. Se me queres, tes que contarmo todo
8. Se lle quero,  debo deitarme con el cando mo pida, aínda que non me apeteza


Escolle unha das afirmacións anteriores e escribe un texto en que deas a túa opinión e  fagas as  túas reflexións persoais sobre ela.  
Haberá dúas categorías: 

1) BACHARELATO

2) 3º e 4º ESO




30 jun 2020

Que soe a música!

Chegou o verán, pero este ano non sabemos se haberá festas e se poderemos escoitar as orquestras. 
Aínda así, música non ha  faltar. Deixamos aquí uns enlaces onde podemos atopar cancións de todos os estilos e para todos os gustos.

Preme  en calquera das liñas que seguen e..., que soe a música!

30 propostas de música en galego actual que tes que coñecer

Queres música en galego? Consulta a lista definitiva cos grupos e os xéneros













22 may 2020

Verso a verso: Todos os días son días das Letras (III)

"O neno preguntaba", outro poema de Celso Emilio, na voz de alumnado de 1º de ESO.
Para todos os nenos e nenas e para os que deixaron atrás a súa nenez. Para seguirmos preguntando, na aula ou desde a casa; para que todos os días sexan días das Letras.