Este xoves tivemos o pracer de ver representada a adaptación ao teatro da obra Contiños da terra de Manuel García Barros, da man da Escola de Artes Escénicas da Estrada. A peza emprega
a liña argumental de tres contos, "A carón da pedra", "O Ciridonio non se
engana" e"O tío Zanfona", e en palabras de Santiago Cortegoso, autor do texto, "serve para poñer en valor á narración oral
como elemento básico de relación social" .
Este martes pola tarde estivemos no teatro. A compañía A Panadaría representou para todo o alumnado de 3º, 4º de ESO e Bacharelato, no salón de actos, a obra Elisa e Marcela. Esta representación de teatro e música, sobre a relación amorosa entre dúas mulleres de principios do século XX, recibiu grandes eloxios da crítica e importantes premios, incluído o Premio ao Mellor Espectáculo María Casares 2018.
O alumnado de 3º, 4º de ESO e Bacharelato estivo na Cidade da Cultura para visitar a exposición Galicia, un relato no mundo. O motivo inicial da saída era poder ver o Cancioneiro da Vaticana, unha das xoias da lírica medieval galega que, por primeira vez en séculos, saíu da biblioteca que o garda, a do Vaticano. Nesta exposición hai outras destacadas pezas de alto valor para a historia e a cultura do
noso país e que se atopan en prestixiosas coleccións museísticas en
distintos recantos do mundo. Visitamos tamén a Colexiata do Sar e, pola tarde, o Museo de Historia Natural.
No ano 2014, o alumnado do IES Laxeiro traballou nun fermoso proxecto,"Haikus contra a violencia de xénero". Baixo a coordinación da profesora Gracia Santorum, conseguiron que moitas escritoras e escritores decidisen tamén contribuír coas súas creacións: Antonio García Teijeiro, María Canosa, Lucía Aldao, Chus Pato, Helena Villar Janeiro, María do Cebreiro, Agustín Fernández Paz, Xabier Docampo... O resultado de todo ese esforzo desembocou nunha publicación única: Libro do Mal Amor, ilustrado por Mar García e Aránzazu Diñeiro, dispoñible na rede.
A partir desta obra, este 25 de novembro elaboramos un pequeno vídeo:
O profesor da Escola Técnica Superior de Enxeñería de Minas de Vigo, José Benito Vázquez, compartiu hoxe dúas sesións co alumnado de 4º de ESO e Bacharelato do Chano. Baixo o título de Física Re-creativa, presentou varios experimentos que nos permitiron descubrir diversos segredos da luz e a súa percepción.
O curso pasado, puxemos en marcha unha iniciativa dirixida a calquera membro da comunidade educativa que tivese curiosidade por coñecer a orixe dos seus apelidos. A esta información engadímoslle un mapa onde figura a frecuencia e extensión de cada un deles, tomado daCartografía dos apelidos de Galicia.
Este ano mantemos a proposta desde a web da biblioteca https://www.chano.gal
Calquera persoa interesada pode facernos chegar a súa petición deixando anotado o apelido no taboleiro do EDLG do Centro ou enviándoo á páxina citada.
O último día de setembro estivo connosco a escritora Estíbaliz Espinosa. A música e a poesía, a muller e a ciencia, estes foron os eixes da súa acción artística, 7 constelacións que xa non son invisibles.
Chegou ata aquí da man do programa da Deputación "Mulleres en acción. Violencia zero"
O día de fin de curso estivo connosco Celso Fernández Sanmartín, "Celsiño". Veu contarnos historias ou, como nós preferimos dicir, contar a Historia. E que ben o fai! Ninguén coma el para unir presente e pasado, mozos e vellos, nun mesmo eixe.
En xuño tamén saímos coa lingua de paseo. Mentres o alumnado de 2º de ESO estaba no Museo do Pobo Galego e 3º paseaba polo centro histórico de Santiago, todo 1º pasaba a mañá no castro de San Cibrán de Las. Visitamos o castro e o seu museo e fixemos actividades para entender mellor as escavacións arqueolóxicas, os habitantes dos castros e a cultura castrexa.
Amosamos aquí o folleto, un cuadríptico, que o EDLG elaborou e distribíu entre o alumnado e os outros membros da comunidade educativa sobre diferentes aspectos de corrección lingüística. Esperamos que esta pequena contribución a prol dunha lingua de calidade sexa do agrado de todas aquelas persoas que o reciban.
No noso concurso de microrrelatos "Mes das Letras" resultaron premiadas dúas rapazas: Silvia Álvarez Fontán, de 2º de ESO, e Laura Alonso Suárez, de 4º.
Queremos agradecer a todos o empeño e a participación.
"As neveiras de Fixó son únicas, un patrimonio extraordinario".
Isto foi algo que recalcou o relator convidado, Tito Concheiro. Este arqueólogo, que dirixiu as escavacións recentemente realizadas, estivo no Centro para explicarnos o que estas neveiras, localizadas na parroquia de Millerada, significaron na súa época. Recordounos que foron construídas no século XVII para fabricar xeo e, o máis importante, explicounos por que se construíron nese lugar, quen o fixo e como o fixeron. Expuxo polo miúdo que pertencían ao arcebispado de Santiago, que era o cabido santiagués quen recibía o xeo e controlaba a súa produción, e todo o que iso implicaba. Case un tesouro.
Todo o alumnado de ESO participou un ano máis no Correlingua. Celebrouse na Estrada o 20 de maio. Alí estaban tamén alumnas e alumnos de todos os centros do concello da Estrada e do IES Pintor Colmeiro de Silleda. Tres horas de festa para falar, cantar e bailar. E en galego, por que non?
Esta vez, ímonos permitir unha licenza; queremos facer referencia a algo que non fixemos nós, pero que a persoa que nos dá nome, Chano Piñeiro, celebraría con gran ledicia:
O director de cine Oliver Laxe acaba de presentar no Festival de Cine de Cannes a película O que arde. Alí, a súa estrea foi un éxito. Esta longametraxe convértese na primeira película que se proxecta en lingua galega no prestixioso festival francés.
Gravada nos Ancares, protagonizada por unha actriz e un actor non profesionais, a medio camiño
entre a ficción e o documental, a película constitúe un achegamento ao poder hipnótico do lume e á profundidade do ser galego.
O que arde estrearase nas salas galegas a finais deste ano 2019. De momento, deixamos aquí un clip que nos permite adiviñar por que recibiu tan excelentes críticas e un enlace a unha crónica sobre ela.
Esta vez, estivemos por terras de Ourense, primeiro en Trasalba, e logo no conxunto histórico e artístico de Santa Mariña de Augas Santas. Tamén visitamos o cemiterio de San Francisco. Queremos recordar que neste cemiterio de Ourense descansan grandes nomes da literatura, as artes e o pensamento:Blanco Amor, Otero Pedrayo, Vicente Risco, Lamas Carvajal, Cuevillas ou Xavier Prado «Lameiro.
Estamos moi moi orgullosos. O noso alumno de 1º de Bacharelato, David Obelleiro Prado, obtivo o 1º Premio, dotado con 600 €, na sección de Poesía, da 47ª edición dos Premios Literarios Minerva, convocados polo colexio Peleteiro.
Nós, que sabemos dos seus dotes para a creación literaria, queremos compartir a alegría que isto nos produce e animalo a seguir escribindo.
Un ano máis, para conmemorar o Día de Rosalía fixemos unha festa. Esta vez, foi unha festa de verdade, con baile e música, tanto gravada como en directo.
Débora e Raúl deleitáronnos bailando a ritmo de merengue "Adiós ríos, adiós fontes" coa orquestra Charleston Big Band.
Rapazas e rapaces de todos os cursos recitaron poemas de Cantares gallegos ou de Follas novas que, a continuación, foron reproducidos en vídeos de cantantes ou grupos que puxeron música a poemas da autora:
Adhara and Ritman, Xardín Desordenado, Narf, O Val das Mouras, Uxía, Aid, Najla Shami, Cristina Pato e Rosa Cedrón, Quempallou, Mínima Son, Radio Cos, Carlos Núñez, Poetarras, Abe Rábade e Guadi Galego, Astarot... E tantos outros que volven a súa ollada musical cara a Rosalía.
Feliz Día de Rosalía!
O profesor Anxo cantou "Negra sombra" e, acompañado dun dos músicos do grupo Nao, interpretou "A xustiza pola man". Grazas por permitirnos desfrutar!
Cal ti es, así me dis. Idiosincrasia e universalidade na fraseoloxía galega foi a charla impartida por Maruxa Álvarez este día 5 de febreiro no noso Centro. Agradecemos á relatora o seu bo facer e á USC a súa colaboración.
O alumnado de Bacharelato e o de 3º e 4º de ESO puido gozar, pola tarde, da visita guiada ao Pórtico da Gloria. Pola mañá, visitamos a exposición Castelao Maxistral, centrada no cadro A derradeira leición do mestre e, a continuación, Alba de Gloria en San Domingos de Bonabal. Un pracer.
Coma en cursos anteriores, celebramos o Día da Ciencia e a Tecnoloxía... en galego! Esta vez, fixémolo o 15 de xaneiro.
Ao longo da xornada, alumnas e alumnos son protagonistas: organizan os obradoiros, explican as demostracións e experimentos e participan como público en obradoiros alleos.
Neste día tamén nos visita o alumnado do colexio Virxe das Dores.
Velaquí un vídeo resumo das actividades desenvolvidas no IES Chano Piñeiro de
Forcarei co gallo desta celebración do Día da Ciencia en Galego do curso
2018/2019. Na actividade, coordinada polo EDLG do centro, colaboraron os
departamentos de Bioloxía, Matemáticas e Tecnoloxía.
Música: "Ata que o lume se apegue" NAO (Un ano máis, grazas, grazas e
grazas!)
Un clásico: O alumnado de 4º de ESO e de 2º de BAC do IES Chano Piñeiro fixo o roteiro Castelao na cidade de Pontevedra e visitou as salas do Museo dedicadas a este autor.
No Centro, puidemos ver dúas exposicións sobre esta figura senlleira da cultura galega. Unha delas sobre os seus Álbums de guerra e a outra baixo o título Castelao na Terra de Montes, con paneis cedidos pola Asociación da Rapa de Sabucedo.
