31 may 2019

As neveiras de Fixó, únicas

"As neveiras de Fixó son únicas, un patrimonio extraordinario".  
Isto foi algo que recalcou o relator convidado, Tito Concheiro. Este arqueólogo, que dirixiu as escavacións recentemente realizadas, estivo no Centro para explicarnos o que estas neveiras, localizadas na parroquia de Millerada,  significaron na súa época. Recordounos que foron construídas no século XVII para  fabricar xeo e, o máis importante, explicounos por que se construíron nese lugar, quen o fixo e como o fixeron. Expuxo polo miúdo que pertencían ao arcebispado de Santiago, que era o cabido santiagués quen recibía o xeo e controlaba a súa produción, e todo o que iso implicaba. Case un tesouro.






Podemos tamén ler información sobre as neveiras en https://www.tabeirosmontes.com/neveiras-de-fixoacute.html


23 may 2019

A festa da lingua

Todo o alumnado de ESO participou un ano máis no Correlingua. Celebrouse  na Estrada o 20 de maio. Alí estaban tamén alumnas e alumnos de todos os centros do concello da Estrada e  do IES  Pintor Colmeiro de Silleda. Tres horas de festa para falar, cantar e bailar. E en galego, por que non?









O Chano e o cine

Esta vez, ímonos  permitir unha licenza; queremos facer referencia a algo que non fixemos nós, pero que a persoa que nos dá nome, Chano Piñeiro, celebraría con gran ledicia:  

O director de  cine Oliver Laxe acaba de presentar no Festival de Cine de Cannes a película O que arde. Alí, a súa estrea foi un éxito. Esta longametraxe convértese na primeira película que se proxecta en lingua galega no prestixioso festival francés.
Gravada nos Ancares, protagonizada por unha actriz e un actor non profesionais,  a medio camiño entre a ficción e o documental, a película constitúe un achegamento ao poder hipnótico do lume e á profundidade do ser galego.

O que arde estrearase nas salas galegas a finais deste ano 2019. De momento, deixamos aquí un clip que nos permite adiviñar por que recibiu tan excelentes críticas e un enlace a unha crónica sobre ela.




2 may 2019

Coa lingua de paseo

Esta vez, estivemos por terras de Ourense, primeiro en Trasalba, e logo no conxunto histórico e artístico  de Santa Mariña de Augas Santas. Tamén visitamos o cemiterio de San Francisco. Queremos recordar que neste cemiterio de Ourense  descansan grandes nomes da literatura, as artes e o pensamento: Blanco Amor, Otero Pedrayo, Vicente Risco, Lamas Carvajal, Cuevillas ou Xavier Prado «Lameiro.

Eis un recordo.